Dásamlegar hafrakökur sem gott er að eiga í frystinum. Tilvaldar til að grípa með fyrir hlaup/æfingu! Einnig fullkomnar með kaffinu á fallegum haustmorgnum.

Hafrakökur eru frábærar fyrir æfingu

Hafrakökur geta verið alveg dásamlega góðar og frábær orkugjafi fyrir æfingu. Þessar hafrakökur eru einnig tilvaldar til að taka með sér í fjallahlaupið eða aðrar ævintýraferðir enda stútfullar af góðri næringu.

Hafrar hafa virkilega góð áhrif á hjartaheilsu okkar og þá sérstaklega kólesterolið. Mikilvægt er þó að velja góða hafra og borða þá reglulega. Hálfur bolli af höfrum gefa okkur um 4 g af trefjum, ásamt helling af vítamínum og steinefnum.

Fyrir þá sem ætla sér ekki að borða þessar hafrakökur í fjallahlaupum eða fyrir æfingu, þá gæti verið gott að hafa þær í minni kantinum (eða minnka sykurinn). Þær eru þá frábærar til að grípa í með kaffinu.

Þær geymast vel í frysti og því gott að baka vel af þeim þegar tími gefst.

Þessi uppskrift gefur um 20 hafrakökur:

1 1/2 bolli tröllahafrar

1 bolli fínir hafrar

1/2 bolli möndlumjöl

1/2 bolli valhnetur

1/3 bolli dökkir súkkulaðibitar og/eða rúsínur

1/3 bolli kókosmjöl

1/4 bolli mulin hörfræ

1 tsk kanill (ceylon)

1 tsk salt

1/2 tsk matarsódi

1/2 bolli bráðið smjör (eða 6 msk kókosolía)

1/3 bolli kókos sykur

1 egg

1/4 bolli hunang

1 tsk vanilla extract eða dropar

• Blandið öllum hráefnum vel saman.

• Setjið skálina í ísskáp í 60 mínútur eða í frysti í 30 mínútur.

• Takið skálina úr ísskáp/frysti og setjið í muffins form og ýtið með gafli vel niður í formið. Einnig hægt að sleppa muffins forminu og setja beint á plötu með bökunarpappír. Setjið þá klípu af deiginu á plötuna og þrýstið niður.

• Stillið ofninn á 180C og bakið í 15-20 mín (eftir stærð á kökunum) .